برنامج رئيس الجمهوريه القادم2

برنامج رئاسى للبيع

الإثنين، 4 أبريل 2011 - 22:35

إذا سألت أى واحد فيكم: تختار مين رئيس مصر؟ هتقولى واحد من أربعة أسماء تقريباّ أو أكثر، مش موضوعنا أسماءهم. إذا سألتك، ليه فلان؟ فى الأغلب ستتحدث عن ميولك الشخصى إليه. و ده حقك ماحدّش قال حاجة.

لكن اسمحلى ألفت انتباهك كأخ، إن لغاية دلوقتى محدش من المرشحين عنده برنامج رئاسى واضح. البرنامج الرئاسى هو المفروض الذى يكون أساس التصويت فى الانتخابات والفوز بها، ثم الالتزام بهذا البرنامج وتنفيذه، يعنى من المفترض أن يتم انتخاب الرئيس على حسب برنامج و خطة مستقبليّة مدروسة من شأنها النهوض بالوطن. ليه ما حدّش فيهم لغاية دلوقتى عنده خطة واضحة و مدروسة؟ ليه معتمدين على شعبيّتهم كأشخاص ضمن ما يمثّله كل واحد فيهم من طائفة فكرية من غير ما يقول هو ناوى يقدّم إيه للبلد عشان الناس تكون موضوعيّة فى اختيارها لما فيه صلاح و إصلاح البلد دى.

حتى تصريحاتهم فى الصحف و التلفزيون مبهمة، مش عارفة ليه كل ما أقرأ لهم تصريح اتذكر أحلامى القوس قزحية التى تنطوى تحت شعار "لمّا اكسب جايزة نوبل للآداب، ها ابقى...." آه أنا عندى تصوّر كامل (لفوْزي) بجائزة نوبل، بس ما عنديش أى تصوّر عن حتى فكرة لقصة أو رواية، و لا أى شخصية، ولا القصة دى هتفيد المجتمع بإيه؟ و إذا قلت غير كدة أبقى كذابة. بس عندى تصوّر كامل (لفوزي) بجائزة نوبل. فهمتوا الفرق؟ طب فهمتوا خطورة الفرق؟ عشان مصر مش جائزة اتصوّر جنبها. مصر مسؤولية ضخمة جداً.

يا ريت لو كل واحد فيهم يكون من الشفافيّة بحيث يعرض خطته على الشعب، حتى يكون الانتخاب على أسس واضحة، وعشان أوّل ثورة بتشبه الزلزال المباغت ال 8 ريختر، بس بيبقى ليه توابع كتير ممكن تنحّيك برضه.

ممكن أديكم نموذج مبسّط عن برنامج رئاسى؟ اوكيه
كمرشح للرئاسة أعتزم بإذن الله ما يلى:
– اعتماداً على- إفادة مصادر بأن دخل قناة السويس 25 مليار. إضافة إلى استرداد 70 مليار من الرئيس السابق. تضم إلى 18 مليار مستحقة من رجل الأعمال أحمد عز. يكون الناتج 113 مليار ننوى اعتماد خطة إصلاحية تشمل كلٍ من:
مواصلات: 10 مليار
- لشراء باصات نقل عام تحل محل الباصات المتهالكة بانتهاء 2011 بشكل نهائى.
- استبدال قطارات السكة الحديد و الإنتهاء من صيانة كاملة للسكك الحديدية فى مارس 2012.
- إعادة افتتاح مترو الأنفاق المطابق لمترو دبى أكتوبر 2012.
- دعم مرتبات سائقى المواصلات وعمّالها بزيادة 10%.
- تطبيق قانون التحرش فى المواصلات العامة فوراً على الجانى دون محاكمة تبعاً لما رصدناه من كوارث فى فيلم 678.
الصحة: 20 مليار
- توزّع فى دعم 40% من أسعار الأدوية.
- إنشاء مستشفى عام كبير فى كل محافظة.
- إعطاء جميع التسهيلات و عفو ضريبى للمستشفيات الدولية بفتح فروع فى محافظات مصر غير القاهرة و الإسكندرية بشرط تخصيص 3 أيام للأسبوع للعلاج المجانى تشمل رعاية طبية كاملة للمريض ببلاش.
- تخفيض أسعار الكشف لدى الأطباء بحد اقصى 50 جنيه ومدة الكشف 30 دقيقة كاملة من حق المريض. (شغل إسلخ واقلب انتهى)
- إنشاء هيئة " الضمير الطبّي" لضمان عدم خلط الإنسانية الطبية بالتجارة الطبية.
الإسكان: 40 مليار .
- إنشاء 6 مليون وحدة سكنية فى مدينة 6 أكتوير صالحة للاستعمال الآدمى لسكان العشوائيات.
- الالتزام بتسكين جميع المناطق العشوائية فى فبراير 2013 و القضاء على المناطق العشوائية تماماً. لن يكون هناك وجود لأى منطقة عشوائية بحلول هذا التاريخ إلا فى أفلام خالد يوسف.
- تحديد أسعار بيع العقارات للمصريين بحد أقصى 1 مليون جنيه (إزاى ناس مش لاقية تسكن ولا تتجوز و أسعار العقارات غالية كدة!! حسّوا بالناس شوية!!!)
- إلغاء الضريبة العقارية بتاتاً.
- تحديد عدد 2 طفل لكل عائلة بدءاً من 2012 ( مانتوا ما تعملوش انفجار سكانى و بعدين تقولولى الرئيس السبب!! أى حد معاه طفل تالت، سجن 3 سنين دون مناقشة).
السياحة: 30 مليار
- إنشاء "الأقصر ديزني" و فتحها للجماهير 2014.
- دعم حفلات عالمية لمشاهير الغناء و الإستعراض فى هوليوود. و التعاقد مع محطات عالمية لبثّها مباشر للتسويق. الإلتزام بتقديم 35 حفلة خلال المدة الرئاسية الوحيدة الواحدة.
- إنشاء متحف مدام توسو للشمع الذى يضم تماثيل لكل الشخصيات التاريخيّة المصرية و العربية. و انتداب العاملين فى متحف مدام توسو بلندن للإشراف على الجودة حتى يتم تخريج أجيال مصرية على نفس المستوى. 2014 برضه.
- تجديد منطقة الحسين و خان الخليلى و إنشاء مواقف خاصة و طرقات خاصة تليق بأهميّة هذه المنطقة. و تجديد مسجد سيّدنا الحسين.
السجون: 7 مليار
- تجديد السجون والزنزانات بحيث تطابق مبادئ احترام الآدمية.
لو حد أجرم يتعاقب، من غير ما أنتهك آدميته و يطلع للمجتمع قنبلة جاهزة للانفجار أو يربى أجيال ذات فكر إجرامى.
و هكذا...
ياريت لو من يطلب الترشح للرئاسة يكون لديه برنامج واضح ليتمكن المواطن من الإدلاء بصوته على أساس ما يعود بالنفع عليه وعلى مجتمعه المحيط، ومهما كانت الاختلافات الفكرية التى تعصف بالمرحلة الانتقالية فقد أثبت المصريون تحضرهم من خلال تقبلهم لنتيجة الاستفتاء على الدستور.